शुभ स्थान – अल्माड़
भादो 12 पैट, वृहस्पतिवार
28अगस्त, 2025

सिद्धीश्री सर्वोपमा योग्यवर-6
आमा-बुबू, ठुल ईजा-ठुल बौज्यू, कका-काकी,ममा-मामी और सबै ठुला कैं म्येरि पैला और ननां कैं प्यार आशीष।
उत्तराखंड में मुख्यमंत्री धामी ज्यू आपुण तरफ बटी खूब लागि रयीं। आपुण पार्टी नेताओं कैं खुशि करणा लिजी लाल बत्ती लै दिण रयीं। य बीच नई मंत्री बनाणै बात लै करण रयीं। वी बाद लै लोग उनूकै देखि बे खुशि नहां बल। हमार गौंक सभापति ज्यू कूणी कि सरकार में अलग-अलग लोग आपुण खिचड़ि बनाण में लागि रयीं। य बीच बिरोधी पार्टी वाल लै खूब सक्रिय है रयीं बल। हरदा और हरकूदा आज भोउ मुख मिलै बे काम करण रयीं बल। हरकूदा नार सुणि बे दुसार नेताओं कैं लै जोश ऐ जाणौ बल। उत्तराखंडा स्कूलों में मास्टर हड़ताल पर छन। नना पढ़ाई चौपट्ट हैरै। उसी लै डीएम सैप रोज छुट्टी करि दिणी बल। देहरादून विधान सभा और सचिवालय वाल गैरसैण विधान सभा बिल भौचर बनाण में लागि रयीं बल।
चौमास में पहाड़ पन जाग-जगां बाट उधरि गयीं। गाड़ी सड़क लै जाग जगां बंद है जाणै। पैली बटी रोड बंद है गयी तो ठीक हुण में बहुत बखत लागि जांछी। आज भोउ बुडलोजर जाग-जगां छन। थ्वड़ै देर में मलु साफ है जाणौ। अलबेर द्यो बखत-बखत पर है जाणौ। हमार गौंक सभापति ज्यू कुनी कि पैली बटी सत झड़ यानी लगातार 7 दिन तक द्यो हूंछी। आब पैली जसै द्यो नि हुन। क्ये करछा बादल फाटण आब-अबै सुणाई में उण रौ। उत्तरकाशी में धराली बाद चमोली-ग्वालदम में थराली में बहुतै नुकसान है पड़ौ। अल्माड़ क्वारब में रोज मलु ऐ जाणौ। सब डरन है रयीं। चौमास में कच्च मकान वाल डरन है रयीं।
पहाड़ा स्कूलों में स्कूली नना कै स्कूल में दाउ भात मिलणै रौ। कौपि- किताब और ड्रेस लै स्कूल बटी मिलण रै। आब स्कूली नना छात्रवृत्ति डबल लै सीद खात में उण रयीं बल। हमर गौंक मधनियौ च्यौल कैं 600 रुपै छात्रवृत्ति मिलण रै बल। मधनी विचार कुलि काम करि बे गुजर बसर करण रौ। आपुण कामौ हर्ज करि बे बैंक गो। बैंक में पैल दिन खात नि खुल। वी बाद दुसार दिन बैंक में खात खुलौ। द्वि दिनै मजुरी 1600 रुपै हर्ज है पड़ौ। आब खात में 600 रुपै ऐ गयीं बल। मधनी आज भोउ मोदी ज्यू बहुत तारीफ करण रौ बल।
पहाड़ा गौनू पन साग-पातै खूब इफरैत हैरै। जो लोग हुनूर करनी। उनार ठंगरा पर लौकि, तोर्या, चिचन लागि रयीं। साग पात बजार बेचि बे लोग आपुण लूण-गुड़ौ खर्च चलाण रयीं। बजार पन गदु लै बहुत महंग बिचाण रयीं। बानरौ उजाड़ चलियै छू। बानर कर्याल लै खै जाणीं। बानरौं उजाड़ देखि लोग परेशान है रयीं। पहाड़ पन रामलीलै तालीम चलि रै। जादेत्तर जगां राम लक्ष्मण और सीता जसै पाट च्येली खेलण रयीं। य भलि बात हैरै कि आब स्यैणी लै अघिल उण रयीं। क्वे-क्वे जगां तो राम लक्ष्मण,रावण,कुभकर्ण जसै सारै पाट स्यैणी खेलण रयीं। पढ़ी-लिखी दीदि बैणी अघिल उण रयीं य भलि बात छू। पर घरौं पन सभापती/प्रधानौ काम तो प्रधान पति, प्रधान ससुर या प्रधान पुत्र करण रयीं। सभापति चुनाव जीतणा लिजी लोगूंल बहुत डबल खर्च करि रौ। आब सब विधायक निधि, सांसद निधि और दुसार-तिसार जगां बटी स्कीम ल्याणै लिजी सोचण रयीं। हमार गौं में आजादी बाद बहुतै सभापति बणीं। जो लै सभापति बणौ वील गौंक रस्त कै नई बनौणै कोशिश करै छू। बाल बाखई पिरमु बुब गिणण रछी कि पछिल 5 साल में हमर गौंक रस्तौ 3 बखत जीर्णोद्वार है पड़ौ। पछिल सभापतिल सभापति बणि बे पैल साल खडंच वाल रस्त बणा। दुसौर साल सीसी मार्ग, तीसौर साल जीप जाणी सड़क। पछिल सभापति गौं तक सड़क ल्यौणा लिजी लागि रछी। अलबेर गौं वालूंल उकै हरै दे।
कुमाऊं में आज भोउ गेवाड़- तड़ागताल में जाबर, गरूड़ में कोटै माई थान और जाग जगां नंदादेवी कौतिक में लोग जानै छन। नैनताल, अल्माड़, भवालि, राणिखेत और दुसार जगां नंदेवी कौतिक हुनै छू। अल्माड़ में लै नंदेवी कौतिक में जाग-जगां बटी दुकानदार ऐ रयीं । 26 अगस्त हूं त्याड़ि ज्यू राठ करा घर में हरताली तीज (रक्षाबंधन) हैगो। कुमाऊं में बिरूड़ पंचमी त्यारा लिजी लै लोग लागि रयीं। सातूं-आठूं त्यार हूं स्यैणी दुब-ज्यौड़ पहननीं। सबै लोगूं कैं नंदेवी कौतिकै बधाई छू।
सरकार गौं वालूं लिजी बहुत सोचण रै। हमार गौंक सभापति ज्यू कूणी कि पैली पहाड़ा लोग लूण खरीदणा लिजी हल्द्वाणि, रामनगर, कोटद्वार और भाबरा बजार जांछी। आब सरकारल गौं-गौं तक लूण पुजै हालौ। कंट्रोल बटी सस्त लूण लोग लिजाण रयीं। कंट्रोल में फ्री राशन आजि तक मिलणै रौ।
आज इतूकै लेखण रयूं।चिट्ठी ठुलि हैगे कै नराज झन हया। रोज सोचनू कि कम लेखूल। पर मनसुप जसै लागि जानी।, चिट्ठी मिलि गे कै एक आंखर लेखि दीया। आज भोउ सबूं मुबाइल पर अनलिमिटेड प्लान हूंछ। एक आंखर लेखि दिला। तुमर मुबाइल घोइण जै क्ये रौ। चिट्ठी पढ़ि बे भल लागलौ तो इष्ट मितुरौं कै लै शेयर करि दीया। चौमास में जब जरूरी काम ह्वौल तबै घर है भ्यार जया। आपुण ज्यौन हिफाजत करीया तबै पालना होलि। बांकि फिर लेखूल
तुमर मितुर,
उदय किरौला
संपादक बालप्रहरी
सचिव बालसाहित्य संस्थान
दरबारीनगर अल्मोड़ा उत्तराखंड
मोबाइल 9412162950
वाट्सअप 9557619107
ई मेल balprahri@gmail.com