शुभ स्थान - डीडीहाट, पिथौरागढ़ 
   असोज 9 पैट, वृहस्पतिवार
    25 सितंबर,2025

सिद्धीश्री सर्वोपमा योग्यवर-6
आमा-बुबू, ठुल ईजा-ठुल बौज्यू, कका-काकी,ममा-मामी और सबै ठुला कैं म्येरि पैला और ननां कैं प्यार आशीष।
उत्तराखंड में डबल इंजनै सरकार चलि रै। अखबार में नेताओं बयान पढ़ि बे लागण रौ कि विकास खूब हैरौ। सरकारि कागजों में खेति पाति काम भलै चलि रौ। विकास प्रदर्शनी में किसानों फसलै प्रदर्शनी लै लागण रै। सरकार जब बटी किसान पिल्सन दिण रै। तब बटी किसान बड़ि गयीं। हमार गौंक पिरमुका शहर में दुकानदारी करनी। गौं जमीन अध्ये में दिरै। आज भोउ उनर नाम लै किसानी में जुड़िगो बल। जो लोग दिल्ली में नौकरी पर छन। उनेरि लै किसान पिल्सन में नाम चढ़ि गो बल। सब मोदी ज्यू कैं देखि खुशि है रयीं। य बीच सरकारि नौकरी लिजी जो इम्तिहान हौछ। वी पेपर लीक हैगो। माल बाखई शिवदा च्यलैल खूब मेहनत करि रछी। सरकारि नौकरी चक्कर में ब्या नि हुण रौय। पेपर लीक हयी बाद बिचार निशाशी रौ।
पहाड़ पन आज भोउ रामलील चलि रयीं। आदु रात तक लोग रामलील देखणा लिजी जाण रयीं। हमार गौंक सभापति ज्यू कूणी कि रामलील धार्मिक आयोजन है जादे हमरि संस्कृति दगाड़ जुड़ी छू। गौं बाखई नानतिन रामलील में बानर और राक्षस बणि बे स्टेज में जानी। बाद में रामलीला ऐक्टर बणनि। आज पहाड़ा जतू लै फिल्मी कलाकार, ऐक्टर, नेता और दुसार ठुल-ठुल लोग छन। उनेरि जड़ रामलील दगाड़ जुड़ी छू। गौं सभापति और दुसार नेता रामलील में भाषण दिण सीखनी। रामलील समझो साल भरी 10 दिनौ त्यार छू। हमार पहाड़ में हिंदू दगड़ै मुसलमान लै रामलील में पाट खेलनी। आज भोउ डीडीहाट में कार्यशाला चलि रै। ब्याल बखत पांडे ज्यू दगाड़ रामलील देखणा लिजी जाण रयूं। बेइ सीता स्वयंवर में ब्यौल बणि बे कमर हलकै आयूं। डायट में प्राचार्य रयी आदरणीय पांगती ज्यू बताण रछी कि जनकौ पाठ खेलणी कलाकार मुस्लिम छन। जो नान छना बटी येति रामलील में पाट खेलनी। किताब कौतिक अभियान दगाड़ जुड़ी संजू पंत ज्यू ताड़का और रावणौ पाट देखण लैक छी। हमार गौंक सभापति ज्यू कूनी कि हमार पहाड़ में हिंदू, मुस्लिम और इसाई सब रामलील, ताजिया और दुसार – तिसार त्यार- ब्यार दगड़ै मनानी। ब्या काज में आपस में धोती-साड़ी न्यूत मनानी। पर नेता लोग चुनाव में आपुण वोट पक्क करणा चक्कर में समाज कैं जाति, धर्म और संप्रदाय नाम पर बांटनी। आज भोउ सोशल मीडिया में लै कुछ लोग एक दुसार धर्मा खिलाफ वालि पोस्ट शेयर करण रयीं य भलि बात नहां।
पहाड़ पन असोज में दिन भर थाकी दीदि बैणीं रामलील देखण हूं औनी। हमरि गौं देबुलि दी रामलील देखणा हूं रोज जैं। पुरि रामलील में से जैं। जै बखत जोकर ऊंछ उ बखत टकि टकि है जैंछ। क्वे-क्वे जगां घुटुक घाटुक लगाणियाल रामलील और दुसार खेल कौतिक बिगाड़ि हाली। सभापती चुनाव बाद गौं बाखई पन लोगों में मनमुटाव जादे हैगो। य वजैल भौतै जगां रामलील खड़बड़ी गयीं।
पहाड़ पन असोज में खेति पाती काम बड़िगो। लोगों कैं पाणि फुर्सत नहां। सबूं है जादे इकलू लोग परेशान छन। हमरि गौं भागुलि दी सरास में इकलै छू। वी ब्यौल नौकरी लिजी दिल्ली जैरौ। बुड़ – बाड़ी यानी सास सौर जिठाण दगाड़ रूनी। आज भोउ असोज समेरणा लिजी रतै पर खेतों में न्है जाणै। नान भौ खुट ज्यौड़ल बादि दीं। नान भौ उसिकै गू मूत में सानी बे से जां। इकलू कारबार वाल सब असोज में परेशान छन।
स्कूला मासैप हड़ताल पर छन। य वजैल कक्षा 6,7 और 8 दर्जा नान भात खैबे सीद घर हूं ऐ जाणीं। चौमास में सीलनै वजैल आंग चसकन-बिसकन है जाणौ। रतै पर आंग गलि जौ जाणौ। रतै पर सोचनू आज रामलील जाण नहां। पर ब्याल हूं रामलील जाणै रयीं। गदुवौ साग खवै चलि रै। असोजा नौर्तन में जाग-जगां दुर्गा पूजन लै चलि रै। घरौं पन कन्या पूजना लिजी च्येली नहां। दुसार गौं बटी आपुण रिश्तेदारों च्येलि बुलै बे कन्या पूजनै तैयारी चलि रै।
आज इतूकै लेखण रयूं। चिट्ठी ठुलि हैगे कै नराज झन हया। रोज सोचनू कि कम लेखूल। पर मनसुप जसै लागि जानी। चिट्ठी मिलि गे कै एक आंखर लेखि दीया। आज भोउ सबूं मुबाइल पर अनलिमिटेड प्लान हूंछ। एक आंखर लेखि दिला। तुमर मुबाइल घोइण जै क्ये रौ। चिट्ठी पढ़ि बे भल लागलौ तो इष्ट मितुरौं कै लै शेयर करि दीया। आपण ज्यानै हिफाजत करीया तबै पालना होलि। बांकि फिर लेखूल
तुमर मितुर,
उदय किरौला
संपादक बालप्रहरी
सचिव बालसाहित्य संस्थान
दरबारीनगर अल्मोड़ा उत्तराखंड