शुभ स्थान - बागस्यर
           भादो 5 पैट,वृहस्पतिवार
           21 अगस्त,2025

सिद्धीश्री सर्वोपमा योग्यवर-6
आमा-बुबू, ठुल ईजा-ठुल बौज्यू, कका-काकी,ममा-मामी और सबै ठुला कैं म्येरि पैला और ननां कैं प्यार आशीष।
उत्तराखंड में पंचैती चुनाव है गयीं। य खबर भलि नहां कि पहाड़ में चुनाव में बंदूक और फायरिंग चलि पड़ी। द्वरहाट में ईंटौं लड़ै लै सोशल मीडिया में देखण में ऐछ। य खबर लै भलि नहां कि प्रमुखा चुनाव में बीडीसी मेंबर कैं आपुण कब्ज में धरणा लिजी नेता लोगूल खूब जोर लगा। जिला पंचैत अध्यक्षा लिजी लै खूब मोलभाव हौछ सुणाई में ऐरै। हमर गौंक सभापति ज्यू कूणी कि जनताल जो नेताओं कैं वोट दिबे जिताछ उ ढिल ढेपू में बिचै गाय। कुछ नेताओं अपहरण लै हैगोई बल। उनार घरा नान तिन डाण मारनै रै गाय। उनेरि मरी ज्यौनै क्ये खबर नि हयि। बाद में रनकरांल डबल खैबे बयान बदलि देयी बल। उनूंल घूमण हूं जै रछी य बयान दे य सुणाई में ऐरै। हमार गौंक सभापति ज्यू कूणी कि जो वोट दिण बखत घूमण हूं न्है गाइ। उनेरि इलाका जनता अंदाज लगै ल्येलि कि उ नेता आपुण चुनावा डबल वसूल करणा लिजी क्ये लै करि सकनी। चुनाव बाद घरौं पन लोगूंल अबोल लिरौ। गुटबाजी में पुर गौं नान जात-ठुल जात, ताल बाखई और माल बाखई और धाड़ में बांटी गो। हारी सभापति भौ नामकना दिन भात खाण हूं लै नि आय।
सरकार ग्रीष्मकाल में गैरसैण में विधानसभा सत्र करण भुलि पड़ी। सरकारल आब गैरसैण कैं चौमास कालीन राजधानी बणै हालौ। गैरसैण ग्रीष्मकालीन राजधानी में विधानसभा सत्र सरकारल धरि रछी। सब शौर्टकट चलौ बल। हमार गौंक सभापति ज्यू कूणी कि विधानसभा सत्रा नाम पर नेता और सैप लोगों सैर सपाटा हैगो। आज भोउ सोशल मीडिया पर एक चिट्ठी वायरल हैरै। उ चिट्ठी में जाड़ौ में गैरसैण में ठंड है जां य वजैल सरकार हूँ विधानसभा सत्र देहरादून में धरणै लिजी प्रार्थना करि रै। उ चिट्ठी में पहाड़ा विधायकों दस्तखत लै छन बल। यूं नेता पहाड़ बटी चुनाव जीति बे मैदाना विधायकौं दगाड़ शामिल है जानी।
पहाड़ा गौंनू पन जन्यो पुन्यो, जन्माष्टमी और घ्यूं संक्रांत दगाड़ 15 अगस्त लै हैगो। पहाड़ पन आब अबै त्यार द्वि-द्वि दिन हुणी। क्वे पंडि ज्यू पातौड़ में त्यार सोमवार तो क्वे पंडित ज्यू पातौड़ में त्यार मंगला दिन हुणौ। हमार गौंक पंडि ज्यूल पातौड़ देखि बे बताछ कि प्रिंसपल सैपूं लिजी 15 अगस्ता दिन अपैट छू। प्रिसपुल सैपूंल 15 अगस्त 14 अगस्तै कै दिन मनै देछ बल। सुणाई में ऐरै कि सैप कैं देखि बे सारै मासैप खुशि छन।
आज भोव पहाड़ पन चौमास में लौकिक और गदू खवै चलि रै। राई डालि बे ककड़ौ रैत बहुत झौझैल है जाणौ। हरी मर्चौ लूण दगाड़ ककाड़ काटि बे लोग खाण रयीं। माल बाखई शिबदाल पैल काकौड़ बचै बे धरि रछी कि घ्यूं संक्रांति दिन मंदिर में ओग चढ़ूंल कै । रतै पर बानरौं दांग ऐ पड़ी। सारै लोगूल कैं लझोड़ि गयीं। स्कूल आते-जाते नान ककाड़ चोरि बे खाण रयीं। हमर गौंक सभापति ज्यू कूणी कि ककड़ै गाई नि लागनी। पर ताल बाखई भौनियै ईज तो निगुर गाई ठोकनै छू।
नई सभापति ज्यूल चुनाव जीति बे सारै गौं बाखई पन यात्री विश्रामा लिजी बैंच लगै हाली। नवरात्रि में स्कूल जाणा लिजी उनूंल पंडि ज्यू थै दिन सुजै रौ बल। य लै सुणाई में ऐरै कि उनूल विधायक निधि बटी स्कूल में अतिरिक्त कक्ष बनाणा लिजी अर्जी दि हाली। विधायक ज्यू मंजूरी बाद उ स्कूल में जाणीं छन बल। य बीच स्कूल में जो 5 नान छी। द्वि दुसार स्कूल में न्है गयीं। आब स्कूल में तीन नान और द्वि मास्टर रै गयीं। रामलीलै तालीम चलि रै। सोल सरादों में धारै बाखई लच्छी घर उण रौ बल।
बागस्यर डायट में ठुल नना दगाड़ एक कार्यशाला में 5 दिन तक छूं। द्यो वजैल सरकारल आज स्कूली नना छुट्टी करि हाली बल। आज इतुकै लेखण रयूं। चिट्ठी ठुलि हैगे कै नराज झन हया। सोचनू कम लेखूल पर मनसुप जसै लागि जानी। चिट्ठी मिलिगे कै एक आंखर लेखि दीया। आज भोउ सबूं कैं मुबाइल पर अनलिमिटेड प्लान हूंछ। एक आंखर लेखि दिला तुमर मुबाइल घोइण ज्ये क्ये रौ। चिट्ठी पढ़ि बे इष्ट मितुरौं कैं लै भेजि दीया। आपुण ज्यानै हिफाजत करीया। तबै पालना होलि। बांकि फिर लेखूल
तुमर मितुर,
उदय किरौला
संपादक बालप्रहरी
सचिव बालसाहित्य संस्थान
दरबारीनगर अल्मोड़ा उत्तराखंड
मोबाइल 9412162950
वाट्सअप 9557619107
ई मेल balprahri@gmail.com